KALIBO, Aklan–Dismayado ro sangka padre-de-pamilya bangud sa masyadong mataas nga panueoktan sa pamasahe it mga tricycle nga nagabiyahe sa Brgy. Poblacion, Kalibo.
Suno sa tagreklamo nga si alyas “Boy” nga nagsimba ag nagpamasyar sanda it anang pamilya kahapon para i-selebrar ro kaadlawan it anang sambilog nga unga.
Eubos sigon ro anang pagkasubo matapos sanda nga magsakay it tricycle halin sa Kalibo Pastrana Park paadto it sangka establisyemento sa bahin it Jaime Cardinal Sin Avenue, Brgy. Andagao, Kalibo kung siin ginsukot sanda it driver it tig P15 pesos.
Ro pag-eaum sigon nana hay nagpanaba eon it pamasahe ro mga tricycle base sa naging pahayag it pilang Sangguniang Bayan member ag mga TODA president ko mga nagtaliwan nga dominggo.
Sambilog pa sa ginakasubo it taagreklamo hay ro owa pagtao it konsiderasyon ag diskwento it driver sa anang daywa ka mga unga nga puro estudyante.
Bangud kara, ginpakamayad sigon nana nga magdangop sa Kalibo Municipal Police Station para ma-klaruhan ro anang concern apang suno sa mga otoridad ro lokal nga gobyerno ro nagakaigo nga ahensya nga magsabat kara.
