KALIBO, Aklan—Padayun pang gina-imbestigahan it Bureau of Fire Protection (BFP)-Libacao ro natabo nga sunog sa sangka panimaeay pasado alas-3:30 kainang aga-aga sa Brgy. Poblacion, Libacao.
Ro nasambit nga baeay hay ginapanag-iyahan ni Jess Remula.
Suno kay FO1 Raven Corros, imbestigador it BFP-Libacao, nag-umpisa ro kaeayo sa dirty kitchen it pamilya Remula.
Madasig sigon nga nag-eapta ro sunog bangud himo ro baeay sa mixed materials.
Nagbuhay sigon it haeos sang oras antes eubusan nga natapna ro sunog.
Ginapahayag nga naga-isaeahanon eamang si Remula sa andang baeay kat matabo ro insidente.
Ginabuebanta nga naga-abot sa haeos P150,000 ro naging danyos it nasambit nga sunog.
Base sa datus it BFP-Libacao, raya eon ro ikaywang insidente it sunog nga nailista sa andang banwa umpisa ko buean it Enero.
