KALIBO, Aklan—Totally burned ro sangka panimaeay matapos nga masunog kaina it agahon sa Sitio Hagakhak, Brgy. Baybay sa banwa it Makato.
Ro nasambit nga baeay hay ginapanag-iyahan it mag-asawang Ben Salem.
Suno kay FO1 Sandro Fernando it Bureau of Fire Protection (BFP)-Makato nga haeos paugdaw eon ro edipisyo sa andang pag-abot sa lugar.
Nabudlayan pa sigon sanda nga makasueod tuga it makitid nga daean bangud nakaplastar ro baeay sa tunga it katangkihan.
Masyado sigon nga mabahoe ro andang firetruck rason nga nabudlayan sanda nga makadiretso kung siin nagdisider eon lang sanda nga sugpunon ro mga fire hose para matapna ro kaeayo.
Dugang pa ni FO1 Fernando nga kabulig nanda sa pagresponde ro mga katapo it Makato Municipal Police Station ag Municipal Disaster Risk Reduction Management Council (MDRRMC)-Makato.
Naging delikado man sigon ro andang operasyon bangud may nabugto nga sangka live wire sa mismong fish pond.
Ro baeay it mag-asawang Salem hay himo sa mixed materials.
Ginasugid nga may kaeayuan ro distansya it mga kasunod nga baeay rason nga ulihi eon napan-uhan ro sunog.
Sa mayad nga swerte, owa it nahalitan sa insidente bangud idto ro mag-asawa sa Makato Public Market kat mag-eontad ro sunog.
Nasayuran nga mabuhay eon nga nagabaligya it batchoy ro mag-asawang Salem sa tindahan rason nga masami sandang nagapanaw it temprano.
Owa man ginduea it BFP-Makato ro posibilidad nga nag-umpisa ro kaeayo sa naaywanan nga naka-eus-on nga kaldero.
Sa inisyal nga pag-usisa, nakalista eon ro Bureau of Fire it kapin sa P45, 000 nga kahalitan.
Sa makaron, nagapadayun pa ro follow up investigation it BFP-Makato para matumod ro ginhalinan it kaeayo.
