KALIBO, Aklan—Gin-kwestiyon ni punong barangay Romy Agustino it Capataga, Malinao ro Department of Labor and Employment ukon DOLE angot sa proseso sa pagpatuman it Tulong Panghanapbuhay sa Ating Disadvantaged/Displaced Workers ukon TUPAD program.
Raya hay kasunod it alegasyon nga owa nag-agi kana ro implementasyon kara.
Matsa may pinilian ukon selective sigon ro mga opisyal sa pagataw-an it programa.
Suno kana nga sa kabilugan nga 23 nga mga punong barangay it banwa it Malinao hay imaw eamang ro naitsapwera ukon owa nakabaton kara .
Gindugang pa nga base sa anang pag-usisa, natukiban nga ro programa hay gintugyan sa dating punong barangay nga si Antonio Fernando.
Raya suno kana ro rason kon ham-an nga nag-alburuto ro pila sa anang mga constituents nga nagahandum nga maeakip sa programa.
Pahayag pa it opisyal nga nakaangkon it pag-eabag sa polisiya sa implementasyon it programa ro dating barangay kapitan bangud nga pabalik-balik ro mga ginapili kara nga benepisyaryo ukon nakaangkon it ginatawag nga duplicate beneficiaries kabaliskaran sa patakaran nga dapat hay sang beses eamang nga maka-avail sa sueod it sang dag-on ro sangka indibidwal agud nga maghilisamit ro tanan .
Nataeupangdan man sigon nga puro miyembro it anang pamilya ag kaalyado ro mga benepisyaryo kun sa siin ro iba sa mga raya hay bukon it residente ag botante it nasambit nga lugar.
Raya man suno kana ro rason kon ham-an nga bukon it imaw ro signatory sa gin-isyu nga certification para sa mga benepisyaryo.
Makabig man sigon nga palpak ro programa bangud nga nagalimpyo ro mga raya sa guwa it andang barangay kundi sa kaiping nga Sitio Batiano sa Barangay Bulabud, Malinao.
Kabay suno kana nga indi gamiton ro programa ag pondo it gobyerno sa personal nga interes it pipilang mga opisyal.
Mabahoe man ro anang pagpati nga ro nagakatabu sa andang barangay hay may eamod pamulitika.
Raya eon ro ikaywang beses nga nagpatuman it TUPAD program sa nasambit nga lugar nga ro tuyo hay magtau it short term nga trabaho sa mga eubus nga nagakinahangean.
Plano nana nga idangop ro isyu sa national office it DOLE.
