KALIBO, Aklan — Nagapahaum eon ro mga learners halin sa Schools Division it Aklan sa pagsabak sa paeaabuton nga National Festival of Talents nga nakataeana sa July 7 hasta 11, 2024 sa Naga City, Cebu.
Suno kay Dobie Parohinog, chief education supervisor it Department of Education (DepEd)-Aklan nga raya hay matapos nga nagpanguna ro mga participants it probinsiya sa bag-o eamang natapos nga Regional Festival of Talents.
Nasayuran nga nagpanguna ro Aklan sa top 5 best performing division sa bilog nga Western Visayas nga may 64 points.
Raya hay ginsundan it Iloilo nga may 63 points, pangatlo ro Negros Occidental nga may 40, 4th place ro Iloilo City nga may 37 ag pang-lima ro Antique nga may 35 points.
Sa nasambit nga Festival of Talents, ginpahayag ni Parohinog nga owa eamang kara gina-hightlights ro exemplary performance it mga partisipante kundi ro dedikasyon ag hardwork it andang mga coaches.
Dugang pa nga raya ro kauna-unahan sa kasaysayan nga ro Division of Aklan sa kabilugan nga 21 nga dibisyon hay nagkampeon sa nasambit nga Festival of Talents.
Raya hay nagakahueugan suno kana nga maabu nga mga inunga sa Aklan ro maaeam sa andang pagsabak sa academic competition ukon tanan nga mga subjects nga ginaturo kanda sa idaeum it K to 12 curriculum .
Madumduman nga kapin sa 600 nga mga learners halin sa 21 nga nagkaeain-eain nga divisions it DepEd Western Visayas ro nagtililipon sa Iloilo National High School para sa daywang adlaw nga 2024 Regional Festival of Talents ko nagtaliwan nga Hunyo 24 hasta 25 .
Ro seven categories hay ro Technolympics for Technology and Livelihood Education, Technical Vocational Education and Technical-Vocational Livelihood; Sining Tanghalan for Music and Arts; Population Development for Social Studies; Read-A-Thon for English and Filipino and Lingo Stars for Special Program in Foreign Language; Musabaqah for Madrasah Education Program; SNEd Expo for Special Needs Education; ag STEMazing for Science, Technology, Engineering, and Mathematics.//
