KALIBO, Aklan—Maayos nga natapos ro kabilugan nga selebrasyon it kapiyestahan ni Sr. Sto. Niño de Kalibo.
Raya hay base sa naging obserbasyon ni Fr. Tudd Belandres, Parish Moderator it St. John the Baptist Cathedral.
Suno kana, iba ro naging daeagan it selebrasyon makaron kumpara ko mga nagtaliwan nga dag-on bangud maabu nga deboto ag turista ro nagpartisipar ag nakisadya.
Raya hay sa pihak nga medyo naging maueanon ro panyempo.
Naging preparado sigon ro tanan nga aktibidad ag paindis-indis.
Owa man ginpamalibaran ni Fr. Tudd nga indi mawaea ro pilang kakueangan apang nagpahayag man raya it pagiging bukas sa pagbaton it mga suhestiyon agud mas mapanami ag ma-improba sa masunod nga mga dinag-on.
Gindayaw man kara ro mga tribu sa andang pagtao it respito sa Simbahan kung siin nagpundo sanda it pagpatik pag-abot sa printi it Cathedral.
Dapat sigon nga maging mabaskog ro debosyon eabaw sa tanan.
Samtang, ginpasaeamatan man kara ro mga parokyano, volunteers, PNP personnel, Philippine Army, iba pang force multipliers, deboto, turista ag ro lokal nga gobyerno it Kalibo.
