Padayun nga mabatyaga ro selebrasyon it libo-libong Espanyol ag football fans sa nagkaeain-eain nga parte it Spain matapos maangkon it national team it nasyon ro kampeonato sa bag-o eamang natapos nga FIFA World Cup kontra sa Argentina.
Matapos nga makapuntos ro star player nga si Ferran Torres, ginpahayag ni Bombo International News Correspondent Edzel Lopez sa Spain nga naghilinugyaw, nagpalakpakan ag nagasinggitan sa mga karsadahon ag pampublikong lugar ro mga tagasuporta sa makasaysayang kadaeag-an it andang koponan.
Nagtililipon sigon ro mga fans sa mga plaza, fan zones, ag iba pang pampublikong lugar agud nga dueueungan nga tan-awon ro final match, aga-aga it Lunes.
Matapos ro ulihing pito it referee, nag-umpisa eon ro mapagsik nga selebrasyon kun sa siin may nagwagayway it mga bandera it Spain, nagkupkupan ro mga tagasuporta, ag nagpatigayon it mga motorcade ag street parties bilang selebrasyon sa andang pagdaog.
Ginakabig it maabu nga mga fans ro kampeonato bilang sambilog eon man nga makasaysayang pagdaog para sa Spanish football, kasunod it mayad nga kampanya it koponan sa torneo ag madinaeag-on nga pagsaka sa pinakamataas nga titulo sa pangkalibutanon nga football.
