Kalibo Aklan ———-Personal nga nagdangop sa Bombo Radyo ro sangka senior citizen agud nga magpangayo it bulig sa anang mga kaparyentehan ag sa mga may mabinueawanon nga tagipusuon nga makatao kana it bulig pinansiyal.
Suno kay Remedios Ocenio, 80 anyos ag residente it Brgy. Estancia, Kalibo nga anang ginapanawagan ro anang mga pamilya sa Sapi-an, Capiz kamana man sa banwa it Numancia ag sa Brgy.Estancia, Kalibo nga kungta hay mataw-an imaw it maskin komporme eamang nga bulig pinansiyal agud nga may pangkaon sanda it anang sambilog nga unga.
Dugang pa kara nga may daywang dominggo eun nga gina-eagnat ro anang unga ag owa sanda it may maibakae it bueong.
Si nanay Ocenio hay may deperensya man sa anang pihak nga mata rason nga nalisdan imaw nga makakita.
Samtang, ginapahalin eun man sigon sanda it tag-iya it andang gina-istaran nga baeay apang sa makarun hay owa sigon sanda it masayluhan.
