KALIBO, Aklan—Uwa eon it kabuhi kat nasapwan ro sangka senior citizen matapos nga nataeopangdan nga may nakahigot nga eubid sa anang liog sa Sitio Ob-Ob Brgy. Mandong, Batan.
Base sa report, ginkilaea ro biktimang si Ricardo Gregorio, 68-anyos ag residente it nasambit nga lugar.
Sa inisyal nga imbestigasyon it Batan PNP, nag-adto ro biktima sa sangka okasyon kon siin idto nana nakit-an ro ginaturo nga suspek sa insidente nga si Pedro Esteves, 24-anyos ag residente it Brgy. Mambuquiao it nasambit nga banwa.
Ginasugid nga nakaangkon it diskusyon sa tunga it magtimbang nga parte bangud nga pareho ro mga raya nga una sa idaeom it impluwensya it aeak.
Gin-ako it suspek nga imaw mismo ro nagbueo it eubid ag ginhigot sa liog it magueang kon siin ana pa sigon raya nga ginguyod ag hana nga ihueog sa bubon apang uwa sigon raya nadayon.
Ko ulihi nataeopangdan ro biktima kon siin si Esteves ro unang ginturo it pila ka mga witness bangud nga imaw ro ulihing nakaibahan it biktima antes natabo ro insidente.
Sa makaron si Esteves hay una eon sa paghinakop it Batan Police Station ag magapangatubang sa nagakaigong kaso.
