KALIBO, Aklan — Ginpaabot it Aklan Police Provincial Office nga magapatuman it signal jamming sa mga mobile phone ukon cellphone, hin-aga nga adlaw it Domingo, Enero 19 sa sueod it festival area nga maga-umpisa alas-6 hasta alas-9 it agahon.
Raya hay kasunod it pagahiwaton nga pilgrims mass nga kada dag-on hay ginatambungan it libu-libo nga mga deboto , bisita ag mga pumueuyu sa prente it St. John the Baptist Cathedral .
Sa advisory nga ginpaguwa it APPO, ginpahayag kara nga ro nasambit nga precautionary measure hay kinahangean nga ipatuman para sa seguridad ag kaeowasan it mga bisita ag deboto.
Angot kara, ginahinyu nanda ro pag-intindi it publiko sa tiempo nga gulping maduea-an it signal ro mga cellphone sa kasagsagan it festival.
Sa pihak nga parte, ro mga ginabawae sa festival area hay ro pagsigarilyo ag paggamit it vape, debotelyang ilimnon, backpack, mataeum nga mga bagay ag baril nga posibleng maging mitsa it disgrasya sa kasagsagan it selebrasyon.
