KALIBO, Aklan—Mabahoe nga bulig para sa Philippine National Police Anti-Cybercrime Group ro pag-obra nga laye sa SIM card registration.
Suno kay Patrolman Emeritu Frutas Jr. it PNP Regional Anti-cybercrime Unit 6 nga pinaagi kara hay madali eon nga matumod ro sin-o man nga criminal nga nagagamit it subscriber identity module ukon SIM card sa paghimo it krimen kamana man sa pagpang-loko ag pagpamaeag.
Sa makaron hay pirma eon lang ni pangueong duterte ro ginahueat agud nga eubusan nga maging laye.
Ginpahayag dugang nga eapnaag man makaron ro spam text message nga naga-offer it mga pekeng part-time ukon work-from-home nga mga trabaho pati man ro mga pekeng delivery bookings nga nakapangbiktima it maskin sa mga kilaeang personalidad kamana man ro mga lottery ag raffle scam.
Sa pihak nga parte, ginpahayag pa ni Patrolman Frutas nga antes nga matapos ro makaron nga dag-on hay posibleng makatukod sanda it satellite office sa kada probinsiya sa bilog nga Western Visayas.
Sa makaron sigon hay padayun ro training it mga pagaboe-on nanda nga tawuhan bangud nga nagakinahangean it maid-id nga imbestigasyon ro nagakatabu nga cybercrime.
