KALIBO, Aklan–Nagpatigayon it simulation exercises ro Department of Education ukon DepEd-Aklan sa Laserna Integrated School sa banwa it Nabas bilang pagpahaum sa face to face classes sa maabot nga Nobyembre 15, 2021.
Suno kay Dr. Miguel Mac Aposin, Schools Division Superintendent it DepEd-Aklan nga all set and ready eon ro nasambit nga eskwelahan matapos nga ma-comply ro tanan nga mga requirements sa pagpatigayon it limitadong face-to-face classes it mga estudyante sa nasambit nga lugar.
Ginpahayag ni Dr. Aposin nga mahabang tiempo eon ro andang gintaeana agud nga tun-an ro implementasyon it pilot face-to face classes sa tunga it COVID-19 pandemic.
Pilang “finishing touches” eon lang sigon ro kinahangeanon para sa pagpatigayon kara.
Nasayuran nga ro Laserna Integrated School eamang ro naga-isaeahanon nga eskwelahan sa Aklan ag kaibahan sa tatlong pampublikong eskwelahan sa Western Visayas nga na-qualify para sa ginaproponer nga pilot testing it face to face classes bangud sa manaba nga kaso it covid 19.
Haeos 100 nga eskwelahan sa bilog nga nasyon ro magabalik sa face to face classes sa nasambit nga petsa.
Ginklaru pa it opisyal nga kindergarten hasta grade 3 eamang ro magapasakop.
Magabuhay ro klase it maximum nga tatlong oras sa kinder samtang sa Grade 1 hasta 3 hay posibleng abuton it ap-at nga oras ag tunga.
Gindugang pa ni Aposin nga magataeana ro eskwelahan it waeo nga classrooms kun sa siin 12 nga mga learners eamang ro pagapasugtan sa sangka klase sa kinder ag 16 sa grade 1 hasta 3.
Pagatunga-on ro mga estudyante sa daywang sections nga magabueos-bueos nga maga attend it half-day nga klase kada domingo sa masunod nga daywang buean.
Magapadayun sigon sanda it andang distance learning gamit ro modules.
Samtang, kaibahan sa andang ginpahaum ro pagbutang it shield nga plastic cover sa pungkuan it kada estudyante.
Dapat man nga may parents consent ro pagsueod it estudyante ag owa raya it pieilitan.
