NEW WASHINGTON, Aklan—Hugut nga ginpamalibaran ni Sangguniang Kabataan Chairman Joanna Tolentino it Brgy. Mabilo, New Washington nga gin-bypass nanda ro andang punong barangay nga si Hon. Meriam Malonosan sa ginhimo nga pagbaylo it pintura sa anang gin donate nga board it andang basketball court.
Nasayuran nga halin sa dating kulay green hay ginbayluhan raya it sky blue nga ginkaakig sigon it punong barangay .
Ginklaru man nana nga may nagakaigo sanda nga sueat ag request sa barangay council kon pwedeng gamiton ro basketball court para sa andang ikaywang pa-liga kasunod it andang nagahilapit nga kapiyestahan sa lugar.
Gin-aprubahan sigon raya sa ginpatigayon nanda nga barangay session.
Matapos nga magpasugot hay gin-umpisahan nanda ro paglimpyo ag pag-repair it board bangud nga medyu may kalumaan eon .
Kaibahan nanda kara ro nagkaeain-eain nga grupo ag organisasyon.
Ginklaru man nana nga bukon it imaw ro nagmandu nga bayluhan ro kulay it board.
Apang, nakaangkon it kontrobersiya ag gin-akusahan sanda nga owa it respeto bangud sa alegasyon nga owa nag-ea-ong sa tag-ana it Sta. Lucia court .
Nangawa sigon sanda bangud nga gin-anunsyo eon it LGU-New Washington nga gin-donate eon it tag-ana it eugta ro basketball court sa barangay council.
Nauna eon nga ginklaru it punong barangay nga owa it eamod pamulitika ro isyu .
Ginasugid nga ro kulay green ro political color it asawa ni kapitan Malonosan kun sa siin nagapadaeagan raya sa maabot nga eleksyon sa sangguniang bayan.
Mag-eowas sa isyu sa SK fund, ginreklamo man ni Tolentino ro pagbawae kana nga mag-attend ko una sa session ag ro owa pagtau kanda it opisina kadungan ro pagbo-oe it lamesa ag bangko ag ginbayluhan it samad.
