KALIBO, Aklan—Ginaimbestigahan eon it Bureau of Fire Protection ro posibleng gintunaan it kaeayo sa nag-eontad nga sunog sa Brgy. Balabag sa isla it Boracay.
Ginpahayag ni FO1 Calixberto Candari VI, arson investigator it BFP Boracay nga nag-umpisa ro sunog bandang alas-4:30 it hapon it adlaw it Sabado ag natapna ro kaeayo bandang alas-5:00 it hapon it kapareho man nga adlaw.
Sa paunang imbestigasyon it BFP, ginpahayag ni Candari nga ro nasunog nga staff house it mga construction workers hay human sa light materials rason nga madasig nga nagkalhit ro kaeayo.
Una kara, uwa sigon it tawo ro staff house kat matabo ro insidente kon sa siin may nakataeopangod nga may nagspark sa sueod nga posibleng gintunaan it kaeayo.
Ginatantya nga kapin sa P150,000 pesos ro naging danyos it nasambit nga sunog.
