KALIBO, Aklan—Nag abot sa P779,595 pesos ro danyos it sunog nga nagpa-ugdaw sa 14 nga baeay ag daywa ro partially burned sa Barangay Tigayon, Kalibo ko Lunes Santo it hapon.
Suno kay FO3 Cristina Sendon it Bureau of Fire Protection ukon BFP-Kalibo nga padayun pa nga gina-imbestigahan it andang national headquarters ro mga ginsumite nga ebidensiya agud nga matumod ro posibleng rason it sunog nga gina alegar nga naghalin sa baeay ni Ignare Asiong.
Sa pihak nga parte, ginpahayag ni FO3 Sendon nga mas pa nanda nga gin pabaskog ro andang fire safety awareness campaign sa komunidad agud nga malikawan ro sunog eabi pa ag grabe kainit ro paniempo makaron.
Ginpamilit kara ro importansiya it pagiging alerto sa oras it insidente it sunog ag ro pag-practice it bucket relay.
Ginlaygayan man nana ro publiko nga regular nga i-check ro electrical installation sa baeay ag mga opisina bangud nga common nga rason sa pagtuhaw it sunog hay ro faulty ukon loose wirings ag overloaded nga electrical connections.
