Padayun ro pagpabaskog it National Food Authority ukon NFA it andang palay procurement program sa probinsiya it aklan.
Kadungan kara, gin engganyo ni Andy Ostan, NFA Capiz branch office nga imaw man ro may hurisdiksyon sa NFA-Aklan unit ro mga mangunguma nga ibaligya ro andang ani sa gobyerno agud nga makabo-oe it insentibo.
Suno kana nga kinahangean nga mapabilin nanda ro andang rice inventory para sa buffer stocking agud nga masabat ro pagkinahangean para sa relief operatios sa tiempo it mga kalamidad ag emerhensiya sa bilog nga nasyon.
Ginpahayag dugang nga mahimo nga makaangkon it buffer stock pinaagi sa pagbakae it paeay.
Gintaeana it NFA ro buying price sa 19 pesos kada kilo para sa malimpyo ag maea nga paeay.
Nagabakae man sanda it eabtong , apang raya hay nakadepende sa andang drying capacity sa balor nga 14 pesos kada kilo.
Gina-usisa man sigon nanda ro klase ag moisture content it paeay.
Sa pihak nga parte, gin-umpisahan eon nanda ro pagpamakae it paeay sa banwa it malinao ag lezo pinaagi sa andang mobile procurement team kun sa siin dapat nga magtaeana it buying schedule.
Gindugang pa ni ostan nga sa andang pag-usisa , una eon sa 10 hasta 20% ro na-ani nga paeay sa bilog nga aklan .
Kadungan kara, gindayaw nana ro kalidad it paeay nga nagahalin sa probinsiya nga pasado sa specifications ag standards it NFA.
Base sa record it ahensiya, kapin sa 10,000 bags eon it paeay ro nabaligya sa warehouse it NFA-aklan umpisa ko katapusan nga domingo it Agosto hasta makaron.
Bangud sa pagtaas it presyo it abono ag labor, ginsuhestiyon sigon nanda sa NFA council nga pataasan ro presyo it ginabakae nga paeay agud nga makabulig sa mga rice farmers apang owa pa it sabat hasta sa makaron.
Ginaduso man nanda ro palay assistance program kaibahan ro mga LGUs ag legislators agud nga madugangan it maskin piso ro andang pagpamakae it paeay.\
Nasayuran nga mataas makaron ro buying price it mga local traders nga naga-abot sa 18 to 20 ro uga ag 15 to 16 pesos sa eabtong depende sa variety ag quality.
