KALIBO, Aklan—Nagapabilin nga bastante ro supply it karne it baboy sa isla it Boracay.
Raya hay matapos nga may bastante pang baboy nga makit-an sa banwa it Nabas, Buruanga ag Malay kon sa siin sanda ro nagasupply idto sa isla.
Apang suno kay Jun Agravante, presidente it Federation of Livestock, Hog and Poultry Association nga nagmahae eon ro presyo kara nga nagaabot sa P150 hasta it P160 pesos ro live weight.
Ginatan-aw sigon it pederasyon nga pag-abot it daywa hasta tatlong buean hay pagakueangon eon ro supply it karne it baboy sa mga merkado eabi eon kon sigidas ro pagpanaeasa it African Swine Fever ukon ASF virus.
Ginpahayag dugang ni Agravante nga uwa eon man haeos it nagakaon makaron it baboy ag sigidas ro pagbaligya it mga hog raisers sa anda pang nabilin nga sapat sa kahadlok nga matapnan man raya it nasambit nga masakit.
Sa pihak kara, mabahoe ro posibilidad nga engkaso nga magsakiri eon gid ro supply it baboy hay abuton it hasta sa P200 pesos ro kilo it live weight ag ro karne hay abuton it hasta sa P300 pesos.
Samtang sa pihak nga parte, hasta sa makaron hay uwa pa it mga apektadong hog raisers ro nakabaton it ayuda maghalin sa Office of the Provincial Veterinarian ukon OPVET Aklan.
