Hugut nga ginabawae it Senate Blue Ribbon Committee ro pag-atubang it mga ginatawag nga “surprise witness” sa mga masunod nga hearing angot sa ginapatigayon nga imbestigasyon sa gina-alegar nga flood control scam.
Suno kay Senador Erwin Tulfo, ginakabig nga chairman it komite, igapatuman ro bag-ong patakaran sa tiempo nga mabilog ro opisyal nga miyembro it panel kasunod it pagbukas it sesyon it Kongreso pagkatapos it State of the Nation Address (SONA) sa Hulyo 27.
Ginpahayag ni Tulfo nga pagapadayunon it komite ro imbestigasyon sa kontrobersiya sa flood control, apang gin-insister nga mas hugut nga beripikasyon it mga affidavit ag ebidensiya ro pagahimuon agud nga masiguro ro kredibilidad it mga testigong maga-atubang sa pagpamati. Tuyo man sigon kara nga malikawan ro pag-uman it mga nauna eon nga isyu ag matumod ro iba pang posibleng eakot sa anomalya.
Mag-eowas sa pagpasabat sa mga responsable, ginasueong man ni Tulfo ro pagbilog it sangka pangmabuhayan nga Philippine Infrastructure Masterplan agud nga maging basehan it tanan nga mga proyekto sa imprastruktura ag owa eon nakabase sa mga prayoridad it kada administrasyon.
Angot kara, gin engganyo nana ro Senado nga suportahan ro Senate Bill No. 1360 ukon ro “Masterplan for Infrastructure and National Development (MIND) Act,” nga nagatuyo nga sambilugon ro pagplano ag pagpatuman it mga proyektong pang-imprastruktura sa bilog nga nasyon agud nga malikawan ro pagdoble it proyekto, mapadasig ro implementasyon, ag masiguro ro mas mayad nga paggamit it pondo it gobyerno.
