MADALAG, Aklan—Naaresto eon it kapulisan ro eaeaking suspek sa pagpatay sa anang katrabaho sa sangka construction site, gabi-i it domingo, Nobyembre 24 sa Barangay Catabana, Madalag.
Ginkilaea ro suspek nga si Mathew Samillano, 34-anyos, ag residente it Laua-an, Antique.
Suno kay P/Lt. Dexter Bonyog, Deputy Chief of Police it Madalag Municipal Police Station nga dating owa pagka-ilintindihan bangud sa isyu it bullying ro ginaturo nga rason it pagbuno it haeos 13 (trese) beses it suspek sa biktimang si Romel Bañares, 46 anyos, tumandok it Barangay Bolo, Roxas City, Capiz, ag parehong nagatrabaho sa sangka construction project sa nasambit nga lugar .
Antes nga natabu ro krimen hay ginasugid nga nagkainitan ro daywa sa ginpatigayon nga team building it kompaniya, kun sa siin imbes nga mas pa nga maging maeapit sa kada isaea hay nagresulta raya sa baeaywan ag haeabyan it bato tuga it kahilungon samtang nagapaligos sa suba .
Pagka-gabi-i hay uman nga nasundan ro away it daywa ag dikara makapilang beses nga nabuno it suspek ro biktima nga nagresulta sa anang hinali nga kamatayon .
Madali nga na-trace it mga awtoridad ro ginakahimtangan it suspek matapos nga magsugid ro anang amigo nga anang ginhinyu nga naghatud kana sa andang baeay sa Laua-an, Antique .
Naaresto si samillano sa ginkasa nga hot pursuit operation sa andang baeay.
Ginapahaum eon ro kasong murder kontra sa suspek.
Sa pihak nga parte, doble ro kasubo nga nabatyagan makaron it pamilya Bañares bangud nga owa pa sigon naeubong ro anang ina nga namatay bangud sa sakit hay iga-uli man ro bangkay it biktima sa andang baeay sa Capiz.
