KALIBO, Aklan–Nakataeanang pagapasakaan makarun nga adlaw it kasong frustrated homicide ro suspek nga nagpamuno sa sangka eaeaki ko petsa 25 it Disyembre sa Barangay Camanci Norte, Numancia.
Ginkilaea ni PMsgt. Felizardo Navarra it Numancia PNP ro biktima nga si John Emman Mahabagi 23 anyos ag residente it nasambitan nga lugar samtang ro suspek hay ginkilaea kay Jasper Teodosio,19 anyos ag residente it barangay Baybay, Makato.
Nasayuran nga ko adlaw it Paskwa hay nagpadueong sa nasambitan nga lugar ro suspek kaibahan pa ro anang sambilog nga magueang agud nga mag-atender it Christmas party.
Sa katung-anan it pagkinasadya hay nagsininggit sigon ro magueang it suspek rason nga ginpakamayad eun lang it tag-iya it baeay nga paulion ro daywang magmaeanghod.
Ginhatod pa sigon it tag-iya it baeay ro daywa sa sakayan it tricycle apang bangud nga hanagob eun hay owa sanda it may masakyan.
Bangud kara hay naghueam sigon it motor ro mangmaeanghod sa biktima apang owa sanda ginpahueam kara nga naging rason man it andang pagkaugot.
Ko ulihi hay may natabo nga komusiyon sa magtimbang nga parte hasta nga ginkabuligan it suspek ag anang magueang nga sakiton ro biktima ag ko ulihi hay natigayon pang bun-on ni Jasper ro biktima.
Ro biktima hay nakaangkon it lastro sa anang waea nga butkon, abaga ag ginlaslas pa ro anang liog apang maswuerte man nga owa it may naangkon nga madaeum nga lastro.
