KALIBO, Aklan—Nakapaeagyo ro suspek sakay it barko paadto sa Metro Manila nga imaw ro responsable sa pagpatay sa branch manager it sangka pawnshop sa Mabini St. Kalibo.
Suno kay Cerilo Esmeriz, residente it Brgy. Cajilo, Makato, bandang alas-6:00 it hapon kat nataeopangdan nanda si Mark Archie Torrefiel, 31-anyos it nasambit nga barangay kaibahan ro anang live-in partner nga si Cristina Oraba nga may daea nga bag ag nagadali-dali sa paghalin.
Ginkutana sigon nanda raya ag ro sabat kanda hay gapanaw it Metro Manila para adtunan ro anang ina nga inatake sa tagipusuon.
Bangud sa emerhensiya ro anang pagpanaw, gilayon sigon sanda nga nagpahatod sa tricycle ag uwa gid ro mga raya nakataeopangod nga may krimen eon nga ginhimo ro suspek.
Pagkaagahon eon sigon nanda nasayuran sa balita nga ginatugis si Torrefiel bangud sa pagpatay kara sa biktima nga si Bonna Hercia Ambay, 24-anyos it Brgy. Nauring, Pandan, Antique.
Samtang sa pihak nga parte, suno mat-a sa driver it tricycle nga si Julian Taay it nasambit man nga lugar, ginhatod malang nana ro daywa paagto sa guwaan agud nga makasakay ro mga raya paadto sa Caticlan kon siin sanda magasakay it barko paadto it Metro Manila.
Pauman uman sigon ro suspek nagasabat nga emergency ro andang pamanaw rason nga nagab-ihan sanda ag alas-11:00 pa ro byahe it barko.
