KALIBO, Aklan—Una eon sa kostudiya it Numancia Municipal Police Station ro suspek sa pagpatay sa 48-anyos nga soltero ko Pebrero 11 sa Brgy. Aliputos, Numancia.
Suno kay PSSgt. Felizardo Navarra, imbestigador it Numancia Municipal Police Station nga magapangatubang sa kasong homicide ro suspek nga si Jomel De Vicente, 22-anyos, residente it nasambit nga lugar matapos ro brutal nga pagpatay sa biktimang si Reynaldo Perjes, 48-anyos, tumandok it Sara, Iloilo.
Ginpahayag ni PSSgt. Navarra nga madasig nga naresolba ro kaso bangud sa pakikipagbueoligan it testigo nga si Ronel Fuentes, 34-anyos nga mismong kaibahan it suspek kat natabo ro krimen.
Napilitan sigon nga magtestigo si Fuentes daea it grabeng konsensya apisar nga ginhambaean eon raya it suspek nga maghipos angot sa hitabu.
Base sa anang panaysayon, gingubat ni De Vicente sa andang baeay ro biktima ag makapilang beses nga gin-handusan it bato ag kahoy sa nagkaeain-eain nga parte it eawas nga naging rason it anang hinali nga kamatayon.
Ginapatihan nga ro dating bagina it magtimbang nga parte ro motibo sa krimen.
