Pursigido ro live-in partner ni Jaheel Custodio, 31-anyos, tumandok it Bry. Talon, Altavas apang presenteng naga-istar sa Brgy. Andagao, Kalibo nga pasakaan it nagakaigong kaso ro suspek nga si Janery Yacub, 35-anyos it Brgy. Bulwang, Numancia.
Suno kay Jobelle Ramos, nadueaan sanda it padre de pamilya eabi eon ro tatlo nana ka mga onga bangud sa krimen.
Desidido sigon imaw nga kasuhan ro suspek para mataw-an it hustisya ro hinali nga kamatayon it anang asawa.
Ginpahayag dugang ni Ramos nga nag-adto eamang sigon sa baraka ro biktima agud nga magsindi it sigarilyo apang uwa nagapasindi ro tag-iya kon uwa nagabakae kana rason nga naghalin si Custodio.
Apang, nakit-an nana ro suspek nga nag-abot ag dikato naghueam it lighter agud nga makapanigarilyo eon imaw apang uwa man sigon imaw pagpahueama sa baylo hay ana pa raya nga ginpatay.
Sa pihak nga parte, naboe-an it CCTV footage ro insidente kon siin nakit-an nga nakaangkon it diskusyon sa tunga it magtimbang nga parte.
Matapos ro diskusyon it mga raya, nagbalik ro biktima ag ginhaboy ro suspek sa guwa it baraka.
Dikara eon gin-eagas ni Yacub si Custudio ag ginbuno it makapilang beses partikular nga nakaangkon raya it lastro sa tuo nga ilokon ag waea nga siki.
Nadaea pa sa ospital ro biktima apang gindeklara nga dead on arrival it nagtatap nga doktor.
Nagsurender ro suspek sa Numancia PNP ag gilayon man nga ginturn-over sa Kalibo PNP para sa nagakaigong disposisyon.
