KALIBO, Aklan—Posibleng magpangatubang sa kasong frustrated homicide ro supek sa pagpang-eabu sa anang kasimaryo ko Pebrero 11 sa Brgy. Mataphao, New Washington.
Suno kay Police Corporal Raul Reña, imbestigador it New Wash Municipal Police Station nga ginahueat eon lang nanda ro pormal nga pagdihon it kaso it pamilya it biktimang si Antonio Retiro kontra sa suspek nga si Dante Baroquillo.
Madumduman nga gin-gubat it suspek nga armado it sanduko ro biktima sa andang panimaeay pasado alas-8:00 it gabi-i ko Biyernes.
Ginasugid nga dating bagina ro motibo sa krimen kung siin nag-angkon it lastro sa uyahon, butkon, alima ag dughan ro biktima.
Sa makaron hay una eon sa eowas nga kahimtangan si Retiro samtang ro suspek hay temporaryong nakakulong sa lock-up cell it New Washington Municipal Police Station.
Nakataeana sigon raya nga iga-inquest hin-aga, adlaw it Lunes para sa nagakaigo nga disposisyon.
Nauna eon nga ginpahayag it pamilya Retiro nga desidido sandang magpasaka it kaso kontra kay Baroquillo para mataw-an it hustisya ro pag-eabu sa andang padre-de-pamilya kamana man nga matur-an raya it leksyon.
