BUSINESS News —- Ginatantiya nga maga abot sa 40,000 nga trabahanteng Filipino ro mataw-an it kahigayunan agud nga makaangkon it trabaho sa Taiwan.
Suno kay Labor Secretary Silvestre Bello III, ginbo-oe eon it Taiwan government ro suspensiyon sa pagpasueod it Overseas Filipino Workers (OFWs) ag paga-umpisahan eon sa Pebrero 15 ro pagbaton it mga trabahanteng Filipino.
Kinahangean eamang ro hugut nga pagsunod it mga dumueuong nga trabahante sa ginapatuman nga guidelines it Central Epidemic Center it Taiwan angot sa COVID-19.
Antes nga makasueod sa Taiwan ro mga OFW dapat hay fully vaccinated eon sanda kontra sa nasambit nga sakit .
Angot kara, obligasyon it employer nga ipa-check in sa hotel ro nagapaabot nga trabahador agud nga magpaidaeum sa sueod it 14 diyas ag matapos ro quarantine hay kinahangean nga magpabilin sa nasambit nga hotel ro OFW sa sueod it pitong adlaw agud nga masiguro nga healthy ag eowas sa COVID-19 antes nga mag agto sa pagasudlan nga trabaho .
Nagpaandam man ro Epidemic Center it Taiwan nga kon indi magsunod sa sueundanan ag iba pang guidelines ro employer, raya hay nagakahueugan it pag-eabag sa “Employment Service Law” ag sanda hay maboe-an it employment permit.
