KALIBO, Aklan—Makaangkon eon it direct flight ro Taiwan sa Kalibo International Airport.
Raya ro ginkumpirma ni Engr. John William Fuerte it Civil Aviation Authority of the Philippines ukon CAAP-Aklan manager.
Nakataeana ro inaugural flight kara sa maabot nga Disyembre 29, 2022.
Suno kana nga Disyembre 2 kunta ro orihinal nga schedule it anang kauna-unahan nga flight apang bangud sa mga pagbag-o it Tiger Air it Taiwan, raya hay ginpaiway.
Ro nasambit nga airline company hay magagamit it Airbus 320 aircraft nga may kapasidad it 180 nga pasahero.
Nasayuran nga raya ro pinaka-ulihi nga nadugang nga international flight sa Kalibo airport antes nga magtapos ro dag-on nga tiempo suno kana sa pagsug-aeaw it bag-ong dag-on ag Ati-Atihan Festival.
Sa pihak nga parte, gindugang pa ni Engr. Fuerte nga may pilang airline companies man halin sa Singapore ro nagpahayag it interest nga makaangkon man it direct flight sa paeuparan.
Ginaeauman nga maga-umpisa ro andang biyahe sa unang parte it 2023.
Mag-eowas kara, padayun man ro negosasyon sa pag angkon it direct flight halin sa Malaysia ag China.
Ginasugid nga nag-umpisa eon ro direct flight it AirAsia halin sa China paagto sa Panglao International Airport ag makaron hay ginaduso ro pag angkon it biyahe sa Kalibo International Airport.
Dugang pa it CAAP-Aklan nga nagapabilin ro direct flight sa paeuparan maghalin sa Incheon, South Korea nga may daywang flight schedule kada adlaw it T’way ag Air Seoul ag sa buean it Marso hay masayuran ro updates kon madugangan ro mga flights.
Mabahoe nga bulig sigon sa turismo ag ekonomiya ro nakataeanang paglunsar it bag-ong direct flight halin sa Taiwan paagto sa Kalibo Airport.
