KALIBO, Aklan—Grounded makaron ro tanan nga PNP Airbus H125 helicopter kasunod it pagbagbag it sangka unit kahapon sa Real, Quezon.
Mismong si PNP Chief PGen. Dionardo Carlos ro nagmando sa pag-ground it tanan nga Airbus H125 helicopter fleet.
Suno kay PNP Spokesperson Col. Jean Fajardo, ro bumagbag nga chopper hay sambilog sa lima nanda nga Airbus helicopters.
Ginpahayag ni Fajardo nga sangka Special Investigation Task group ro ginbilog ni Gen. Carlos para magpatigayun it maeapnagon nga imbestigasyon sa insidente nga nagtuga it daywang ninahan ag sambilog nga patay.
Personal man nga ginkumusta kahapon ni Gen. Carlos ro piloto nga si PLTCOL Dexter Vitug, ag Co-pilot PLTCOL Michael Melloria nga naninahan sa insidente ag presenteng nagapamayad sa PNP General Hospital.
Ginpaabot man it PNP Chief ro anang pakikisimpatiya sa pamilya it namatay nga pasahero it chopper nga si Pat. Allen Noel U Ona, kadungan it promisang makabaton it bulig pinansiyal ro anang mga naulila.
