KALIBO, Aklan—Sa pihak it ginpatuman nga community quarantine bangud sa coronavirus disease ukon Covid-19 pandemic, natigayon pa nga maabot it Bureau of Internal Revenue ukon BIR-Aklan ro andang target goal umpisa ko buean it Enero hasta Marso it makaron nga dag-on.
Suno kay Nelia Demalata, revenue district officer it BIR-Aklan nga ginaeauman eon nanda ro manaba nga koleksyon makaron nga 2020.
Umpisa ko buean it Abril suno kana hay haeos nagsarado eon ro mga establisimento komersiyal sa isla it Boracay nga sambilog sa mga mabahoe nga contributor it tax collection.
Nagakanugon man imaw bangud nga owa nag dere-deretso ro manami nga trend ko nagtaliwan nga dag-on, kun sa siin ro Aklan hay nag-numero sa tax collection sa limang distrito ag pang lima sa bilog nga nasyong Pilipinas.
Sa pihak kara, kumpiyansa si Demalata nga sa second quarter it 2021 hay makabawi ro andang koleksyon ag ro ekonomiya it Pilipinas.
Nauna eon nga ginpahayag it Department of Tourism ukon DOT region 6 nga haeos P11 bilyon ro nalugi sa tourism receipts sa isla ukon katumbas it masobra sa P500 milyon nga tax collection.
Sa pihak kara, ma-justify man sigon nanda ro pagbagsak it andang koleksyon.
