KALIBO, Aklan—Padayun nga ginabuoeng sa sangka ospital sa banwa it Kalibo ro sangka persona matapos nga gin-eabo it kaugalingon nga gumankon bandang alas-6:30 ko gabi-i it Huwebes sa bahin it Brgy. Rivera, Libacao.
Suno kay Police Staff Sergeant John Bert Zaulda it Libacao Municipal Police Station nga samtang nagapauli sigon ro suspek/victim nga si Arnel Beltran hay gin-abangan raya sa daean nanday Michael Beltran ag Lito Saminio nga armado it sanduko.
Insigida sigon nga gin-euok ni Michael ro anang tiyo apang kat makit-an kara nga matsa nagagabot it sanduko ro anang kaibahan hay madasig man kara nga gingabot ro anang daea nga hinangiban ag gin-eabo sa anang gumankon para imaw hay makabuhi.
Apang, nagbaeos man sigon it pag-eabo si Michael kun siin nakaangkon raya it lastro sa anang tuo nga nga hita.
Sa pagkahueog sigon ni Arnel hay ginkabuligan raya nga eab-on it daywa rason para makaangkon imaw it lastro sa tuo nga porsyon it ueo.
Sa pihak karam, nahimo pa gihapon nga makabaeos ni Arnel kay Michael rason para mag-angkon man raya it nagkaeain-eain nga lastro sa kaeawasan.
Pagkakita sigon ni Lito sa kinagamo it magtiyo hay madasig rayang nagdaeagan para magpaeagiw.
Matapos kara hay nag-aeabutan man ro mga pumueoyo sa lugar ag gilayon nga gindaea sa Libacao Municipal Infirmary ro magtiyo apang ginpamayad man nga ideretso sa banwa it Kalibo si Michael matapos nga makaangkon it pilang ka mga tama it pag-eabo.//Nasayuran nga may dati eon nga alitan ro magtimbang nga parte.
Sa makaron, una eon sa kustodiya it Libacao PNP sanday Arnel ag Lito para sa nagakaigo na disposisyon samtang nagapadayun man ro follow up investigation it pulisya angot sa insidente.
