KALIBO, Aklan — Arestado ag kulong makaron ro sangka tokhang surrenderer sa ginpatigayon nga drug buy-bust operation it mga awtoridad sa Pastrana Extension, Brgy. Poblacion, Kalibo, aga-aga it Biyernes, Abril 11, 2025.
Suno kay P/Maj. Frensy Andrade, hepe it Kalibo Municipal Police Station haeos pilang buean man ro ginhimo nga pag-monitor it kapulisan sa illegal nga aktibidad it suspek .
Ginkilaea ro suspek nga si alyas Arnel ukon alyas Pompe, 42, barangay tanod it Brgy. Old Buswang, Kalibo ag presenteng naga-istar sa nasambit nga lugar.
Ginakabig sigon imaw nga sangka High Value Individual.
Kaeabanan sa anang mga parokyano hay ro mga nagapueaw ag nagasugae sa mga namatyan.
Nakumpiska halin sa suspek ro 9 nga maintok nga sachet it ginadudahan nga shabu nga may standard drug price nga P12,000 hasta P15,000.
Narekober raya sa boesa it suspek sa pag-rekisa kana.
Nauna kara, nakipag-transaksyon si alyas Arnel sa poseur buyer it mga awtoridad ag matapos nga mabak-ean it daywang sachet it suspected shabu kabaylo it P4,000 nga buy-bust money hay insigida imaw nga gindakop it mga tawuhan it Kalibo PNP ag Provincial Drug Enforcement Unit (PDEU) Aklan.
Aminado man si Major Andrade nga naging asset nanda ro suspek sa mga ginpatigayon nga operasyon kontra sa illegal nga droga, apang bukon sigon raya it yabe agud nga pasugtan sanda sa andang illegal nga hilimuon.
Ro suspek hay nagapangatubang sa reklamong pag-eabag sa Republic Act 9165 ukon Comprehensive Dangerous Drugs Act of 2002.
Gin-insister pa ni Andrade nga tuyo nanda nga matapna eon ro ilegal nga droga sa probinsiya agud nga maprotektahan ro publiko sa anumang klase it krimen.
Apela pa nana nga sa mga user ag pusher nga magbag-o eon ag likawan ro maeain nga bisyo bangud nga owa raya nga manami nga madangatan.
