KALIBO, Aklan—Kabaliskaran sa ginaeauman, mas pang nagsangkiri ro pasahero it sangka transport group maskin nga nag-umpisa eon ro in-person classes sa tanan nga lebel.
Suno kay alyas Kai-Kai, dispatcher it pampasaherong jeepney nga may biyaheng Dumaguit-Kalibo vice versa sa Eastern Terminal nga mas mayad pa nga owa it klase bangud nga mas maabu pa kato ro andang pasahero.
Nataeupangdan sigon nanda nga mas maeaka ro pasahero makaron sa pagpati nga nagatipid ro mga ginikanan para sa pagbalik-eskwela it andang mga inunga.
Sa pihak nga parte, dobleng kalbaryo sigon sa andang mga driver ro uman eon man nga pagpataas it presyo it produktong petrolyo matapos ro pitong sunud-sunod nga domingo nga oil price rollback.
Ro ginakita sigon it mga raya nga P200 hasta P300 nga porsiyento sa gina-boundarihan nga saeakyan hay kueang pa sa kinahangeanon it andang pamilya sa pang adlaw adlaw eabi pa ag uman nga nagbalik ro in-person classes.
Angot kara, uman sanda nga nag apela sa mga pasahero nga indi eon magreklamo sa ginasukot nga regular nga pamasahe nga P40 ag P35 nga discounted fare sa mga estudyante ag senior citizens.
