KALIBO, Aklan—Haum eon ro tribung Pride of Libtong it Estancia, Kalibo sa street dance competition sa Sabado nga adlaw, Enero 14 para sa Kalibo Ati-Atihan Festival 2023.
Suno kay Chris Diangson, tribe leader it nasambit nga grupo nga preparado eon ro andang ati-atihan warriors nga may 71 nga dancers ag kapin sa 60 nga mga drummers kamana man ro andang mga makolor nga costumes.
Ro sadsad hay maga-umpisa sa capitol hasta sa Kalibo pastrana park.
Nagapati imaw nga haeos tanan nga mga tribu sa tribal big category hay magapakitang gilas para sa pag angkon sa grand prize nga 1 million pesos.
Excited eon sigon ro tanan ag makaeaum it mataas nga lebel it enerhiya sa pagsadsad pagkatapos it daywang dag-on nga pagpaiway tuga it coronavirus pandemic.
Masayuran makaron nga dag-on kon madepensahan pa it dating kampeon nga Vikings it Dumga, Makato ro iba pang tribu partikular ro Black Beauty Boys nga nauna eon nga nabutang sa hall of fame, Tribu Linabuanon ag Tribu Alibangbang it Linabuan Norte, Kalibo, Maharlika Tribe it Dumga, Makato, Pangawasan Tribe it Cayangwan, Makato, Pride of Libtong it Estancia, Kalibo ag Tribu Tiis Tiis it New Buswang, Kalibo.
May ginpahaum ro Kalibo Ati-Atihan Festival Board nga kabilugan nga P3.380 million pesos nga cash prizes para sa mga magadaog sa Kalibo Sadsad Ati-Atihan contest.
Sa Tribal Big category, ro grand winner hay maga-uli it P1 million, ro second placer hay P300,000, ag ro third placer hay P170,000.
Sa pihak nga parte, gindugang pa ni Diangson nga mabahoe ro anang debosyon kay Sr. Sto. Niño de Kalibo bangud nga pinaagi sa anang pagpanaad sa Batang Hesus hay nataw-an sanda it unga it anang misis nga mabuhay nga tiempo nanda nga ginhueat.
