KALIBO, Aklan—Mag-eowas sa ginpahaba nga curfew, uman nga ginpatuman it lokal nga gobyerno it Altavas ro liquor ban samtang sa idaeum it modified general community quarantine (MGCQ) ro bilog nga probinsiya it Aklan.
Raya ro ginpahayag ni Mayor Denny Refol Jr. pinaagi sa anang ginpaguwa nga Executive Order No. 41 nga may petsang Agosto 30, kun sa siin ginapatuman nanda makaron ro 8:00p.m. to 5:00a.m nga curfew hour.
Tuyo it nasambit nga tikang it alkalde nga malimitahan ro hueag it mga tawo agud nga matapna ro posibleng pagkalhit it coronavirus disease 2019.
Mag-eowas kara, ginmandu man ni Mayor Refol ro mandatory nga pagsuksok it face shield ag facemask sa tanan nga mga pampubling lugar ag pribadong mga establisimento.
Exempted sa nasambit nga mandu ro mga may trabaho, may mga medical emergencies, mga opisyal ag empleyado it gobyerno ag iba pang indibidwal nga may importanteng paeanawon nga may nagakaigo nga abiso it alkalde.
Sa pihak nga parte, bawae man sa ginpaguwa nga mandu ro pagbaligya it anumang alcoholic beverage ag ro pag-inom it aeak sa mga pampublikong lugar.
Nasayuran nga ro banwa it Altavas eamang ro nagpahaba it andang curfew hours ag nagbalik it liquor ban sa bilog nga Aklan.
