BORACAY Island — Uman nga nagbalik sa isla it Boracay sa ikatlong beses ro cruise ship nga MV Norwegian Spirit kahapon nga adlaw it Sabado, Disyembre 28.
Sa raya nga kahigayunan hay sakay it nasambit nga cruise ship ro 2,108 nga pasahero ag 906 crew.
Ginpahayag ni Niven Maquirang, Port Cruise Ships Operations nga base sa andang datos, kapin sa 2,204 ro nagpanaog halin sa vessel nga ginakaeakipan it 1,914 nga mga turista ag 291 nga mga crew.
Nakahimo it limang beach transfer, 7 land tour ag uwa ginpaeampas it mga raya nga maadtunan ro Motag Museum, mangrove area sa Manoc-Manoc ag ro majority sa mga raya hay nagpaligos sa baybayon partikular sa front beach area it nasambit nga isla.
Ginkalipay sigon it lokal nga gobyerno it Malay nga sa 10 days travel tour it cruise ship hay napabahin ro Boracay sa andang iterinary nga ro buot hambaeon hay nagapanguna gihapon raya nga destinasyon it mga turista sa andang pagbisita sa mga maanyag nga isla sa bilog nga kalibutan.
Raya ro pang siyam ag ulihi nga cruise ship nga nag-abot sa Boracay sa pagtapos it dag-on 2024.
Kadungan kara, ginkalipay man nga ihayag ni Maquirang nga umabot sa 26,000 ro tourist arrival sa isla makaron nga weekend agud nga idto sa Boracay sug-aeawon ro Bag-ong Dag-on.
Nasayuran nga maabong activities ro ginatanyag makaron it mga hotels and resorts ag iba pang establisyimento agud nga maging memorable ro andang bakasyon ag sambilog eon sa pinaka highlights hay ro fireworks display sa new year’s eve.
