KALIBO, Aklan–Pormal eon nga nag-umpisa ro unang adlaw it klase it set B it mga estudyante sa Kalibo Pilot Elementary School makaron nga adlaw it Martes, Agosto 30.
Suno kay Mr. Allan Relloto, Principal II it Kalibo Pilot Elementary School nga nagpatigayun sanda it flag raising ceremony kaina it agahon bilang pag-welcome sa mga learners matapos ro haeos daywang dag-on nga implementasyon it blended learning.
Padayun sigon nanda nga ginapatuman ro kaparehong protocols ko nagtaliwan nga dominggo.
Partikular ro pagsuksok it face mask, pagsikyar sa body temperature, paggamit it alcohol ukon paghugas it alima.
Tuyo kara nga masigurado ro kaeuwasan it mga unga.
Gin-abisuhan eon man sigon nanda ro mga ginikanan nga indi eon pagpasudlon sa eskwelahan ro andang unga engkaso nga makabatyag it anumang sintomas it COVID-19.
Angot kara, nag-request man sanda sa lokal nga gobyerno partikular sa mga Kalibo Auxiliary Police (KAP) nga nagabantay sa Gate 3 nga magtaeana it espasyo para sa mga ginikanan nga nagasueang it andang unga.
Agud nga mabuligan nga mapahagan-hagan ro daeagan it trapiko ag physical distancing, gintunga-tunga man nanda ro mga Grade level sa paga-sudlan nga gate, kun sa siin sa Mabini St. sa andang main gate, raya hay gintaeana para sa SPED ag Grade 3 learners samtang sa gate 2 sa may Roxas Avenue hay para sa mga Kindergarten, Grades 1, 2, ag 6 ag ro gate 3 sa may NAWASA tower hay para sa Grades 4 and 5.
