KALIBO, Aklan—Nagapati ro progresibong grupong Kabataan Partylist nga igabida ni Pangueong Ferdinand “Bongbong” Marcos Jr., sa anang nakataeanang ikaywang state-of-the-nation-address ukon SONA sa Lunes nga adlaw ro priority programs it Maharlika Investment Fund ukon MIF Law.
Suno kay Kabataan Partylist Representative Raoul Manuel nga bangud nga may bastante man nga pondo ro gobyerno hay itaeana raya sa mga nagapangunang problema it nasyon kapareho it edukasyon.
Kinahangean man sigon nga maaksyunan eon ro ginaduso nga pagpataas sa sweldo it mga obrero ag mga manugturo.
Masubo suno kana bangud nga mas nauna pa nga ginsertipikahan bilang urgent ro mandatory ROTC bill nga dugang nga gastos eamang ag indi man mapuslan it kaabuan.
Sa pihak nga parte, ginkumpirma ni Manuel nga kaibahan nanda nga magatambong sa SONA si Dyan Gumanao, sangka manugturo sa Cebu nga naging biktima it illegal arrest sa idaeum it Marcos Jr. administration.
Tuyo kara nga matestingan ro panindugan it pangueo angot sa pag-respeto sa tawhanong kinamatarung.
Hasta makaron suno kana hay nagapadayun ro pag abuso it mga katapo it kapulisan ag militar, apang owa it nabatian nga komento halin sa pangueo.
Samtang, gintaw-an it bagsak nga grado nga singko ni manuel ro unang dag-on nga pagpanerbisyo ni Marcos Jr. sa serbisyo.
