KALIBO, Aklan—Nagtaas it kapin sa 13.7 percent ro unemployment rate sa bilog nga Western Visayas sa buean it Abril bangud sa Covid-19 pandemic.
Suno kay Statistician II Peter Mangilog it Philippine Statistics Authority (PSA) Aklan, raya ro unang beses sa maabong dinag-on nga nagtaliwan nga nakalista ro ahensya it makaraya kataas nga unemployment rate.
Katumbas sigon raya it 417,319 individuals nga uwa it trabaho sa kasagsagan it community quarantine tuga it pandemya.
Samtang, ro employment rate hay nagnaba man raya sa 86.3 percent ukon katumbas it 2.6 milyon individuals halin sa 95.2 percent.
Suno pa kay Mangilog, eubus nga naapektuhan ro labor sector ag nagsakripisyo it husto bangud sa pandemya.
Bangud kara, ginatinguhaan it gobyerno nga maamatan it buksan ro mga serbisyo agud nga makabangon it uman ro ekonomiya it nasyon kamana man makabalik sa andang trabaho ro mga obrero nga temporaryong nadueaan it trabaho.
Nasayuran nga base sa datos it Department of Labor and Employment (DOLE) Aklan nga sangka establisyimento nga may 11 empleyado eamang ro andang nailista nga permamenteng nagsarado tuga it Covid-19 crisis.
Mag-eowas kara, 13 iba pa ro nagbawas it mga tawo ag 56 ka mga establisyimento mat-a ro nagpatuman it alternative work scheme, nagbawas it work days ukon rotation it workers.
