Magakansela ro United Airlines it kapin sa 5% it mga naka iskedyul nga biyahe bilang short term bangud sa pagtaas it presyo it jet fuel tuga it nagalala nga gyera sa Middle East.
Suno sa pamunuan it eroplano, kon magapabilin sa mataas nga lebel ro presyo it langis, posibleng umabot sa dugang nga $11 billion kada dag-on ro gastos it airline sa jet fuel.
Paathag pa it paeoparan, base sa andang mga projection, posibleng umabot sa $175 kada bariles ro presyo it langis ag inde magnaba sa $100 hasta sa katapusan it 2027.
Sa makaron, planong ibalik it airline ro bilog nga flight schedule sa masunod nga season, apang temporaryong pagabuhinan ro kapasidad kara eabi eon sa mga off-peak periods sa ikaywa ag ikatlong quarter it dag-on.
Kaibahan sa mga tikang it airline ro pagpundo it pilang ruta paadto sa Ben Gurion International Airport sa Israel ag Dubai International Airport sa United Arab Emirates, nga apektado it kapin sa 1% it kabilugang kapasidad it paeoparan.
Tuyo it nasambit nga mga pagbag-o nga madumaeahan it maayos ro nagataas nga gastos samtang padayon nga ginabagay it airline ro operasyon sa presenteng kondisyon it merkado.
