KALIBO, Aklan—Haeos 50 porsiyento eon nga tapos ro ginapatindog nga extension campus it University of the Philippines ukon UP-Visayas sa Barangay Nauring sa Pandan, Antique.
Suno kay Anna Razel Ramirez, project development assistant for Antique, office of the chancellor UP Visayas nga posibleng sa buean it Setyembre hay matapos eon raya.
Ro 900 square meters nga tatlong panaegan nga istraktura nga may pondo nga P50 milyon hay may mga kwarto para sa classrooms, taeatapan, training spaces ag conference room.
Ro eugta hay gindonar it pamilya Bautista.
Ginaeauman nga maabu sigon nga mga estudyante ag trainees halin sa nasambit nga banwa ag kaiping nga mga probinsiya ro maka-eskwela sa oras nga matapos eon ro pagtukod it bag-ong campus.
Kaparte man it plano ro pag-offer it mga kurso sa ulihi nga mga paniempo partikular sa fisheries education.
Apang sa makaron hay puro extension programs anay ro ginahimo idtu kun sa siin gin umpisahan eon ro pagpatigayon it mga trainings.
Nagaeaum man sanda nga makaangkon it collaboration sa University of Antique ag Department of Education ukon DepEd Antique sa pagpatigayon it mga programa.
Samtang, ro inisyatibo hay ginduso sigon ni Deputy Speaker ag Antique Representative Loren Legarda nga makaron hay uman nga nailihir bilang senador sa bag-o eamang natapos nga eleksyon.
