KALIBO, Aklan — Nagka-areglo eon ro driver it pick-up nga saeakyan ag pamilya it driver it motorsiklo nga binawian it hueam nga kinabuhi matapos nga maeakot ro mga raya sa sangka vehicular accident sa national highway nga sakop it boundary it Brgy. Tabangka ag Dongon West, Numancia, bandang alas-9 it agahon it Miyerkules, Mayo 14.
Raya ro ginpahayag ni P/Capt. Conrado Espino , OIC it Numancia Municipal Police Station.
Suno kana nga base sa imbestigasyon, nag-overtake ro 34 anyos nga driver it Hi-lux nga saeakyan nga kulay itom sa anang kasunod nga kotse nga paagto kunta sa direksyon it Kalibo.
Sa pagtabok kara sa pihak nga linya, gulpi man nga nagsoepot ro nagaharurot nga motorsiklo nga ginamaneho it sangka 26 anyos nga eaeaki nga paagto sa direksyon it Makato rason nga nag-eontad ro head-on collision.
Bangud sa naagum nga grabeng lastro it rider hay gindeklara raya nga dead on arrival it nagtatap nga doktor sa Aklan Provincial Hospital.
Nasayuran nga ro rider hay residente it Brgy. Silakat Nonok sa banwa it Lezo samtang ro driver it saeakyan hay taga-Sambiray, Malay.
Sa pihak nga parte, bangud sa sunud-sunod nga aksidente sa karsadahon, nagtau it paandam si P/Capt Espino sa mga motorista angot sa defensive driving principles nga dapat nanda nga tandaan ag pwedeng obrahon bangud nga indi sigon masayuran kon hin-uno matabu ro disgrasya sa karsada.
Pinaka-importante suno kana ro pirmeng magsunod sa batas trapiko.
Likawan nga magpadaeagan it masyadong madasig ag indi man magmaneho kon owa sa kundisyon ro eawas eabi eon kon hilong ag ginaduyog .
