KALIBO, Aklan—Sa pihak it ginaeauman nga kaakig it China, ginpadayun gihapon ni US House of Representatives Speaker Nancy Pelosi ro anang pagbisita sa Taiwan.
Suno kay Bombo International Correspondent Greg Aguilar it California, USA nga gusto eamang nga ipakita ni Pelosi ro anang suporta sa mga kaalyado.
Owa sigon ginsunod ni Pelosi nga mabuhay eon nga kritiko it China ro advise it andang militar ag ni US president Joe Biden nga indi i-eakip ro Taiwan sa anang pagabisitahon nga nasyon sa Asya.
Posible man sigon nga sa Enero sa masunod nga dag-on hay bukon eon it si Pelosi ro magiging house speaker kasunod it pagahiwaton nga eleksyon sa Nobyembre.
Sa pihak kara, ginpahayag ni Aguilar nga ginakilaea gihapon it Amerika ro one-China policy nga buot hambaeon nga sakop it teritoryo it China ro Taiwan.
Nasayuran nga ginkundina it China ro pagbisita ni Pelosi sa Taiwan, kun sa siin andang ginhambae nga raya hay nakaangkon it grabeng impact sa political foundation it relasyon it China ag US.
Sa makaron hay makita sigon ro Chinese warplanes sa linya nga nagatunga sa Taiwan Strait ag ginahambae nga magapatigayon ro People’s Liberation Army it exercises sa Taiwan umpisa Huwebes hasta domingo nga adlaw.
Kaibahan sa pagabisitahon ni Pelosi hay ro Singapore, Malaysia, South Korea ag Japan.
Owa gin-anunsyo ro anang pag-agto sa Taiwan apang ginaeauman it kaabuan.
