Ginpahayag ni US National Security Adviser Jake Sullivan nga pagahimuon it Amerika ro anumang kinahang-eanon para masiguro nga matigayon it Pilipinas ro resupply mission sa BRP Sierra Madre nga nagaserbeng outpost sa Ayungin shoal para iinsister ro soberaniya it Pilipinas sa West Philippine Sea.
Sa sangka forum conference sa Colorado, ginpahayag ni Sullivan nga ginklaro it Amerika sa China nga sakop ro public vessels kaparehas it BRP Sierra Madre nga nakasadsad sa Ayungin shoal sa Mutual Defense Treaty it Estados Unidos sa Pilipinas.
Ginpahayag dugang nga gintinguhaan sigon it Amerika nga konsultahon ro Pilipinas bangud nga raya hay desisyon nga dapat ro Pilipinas ro magpanguna, kon paano mas epektibong maipatigayon ro reprovision sa barko agud masustine ro suplay it pagkaon, tubi ag iba pang kinahang-eanon it mga tropang nakaistasyon idto para maipadayon ro andang misyon ag himuon sigon it US ro anumang kinahang-ean para maipatuman raya it Pilipinas.
Apang, pag-abot sa kon ano ro partikular nga konsepto it mga operasyon ukon pamaagi nga makiangot kara ro Estados Unidos hay ginpahayag ni Sullivan nga ipabilin nanda ro status quo sa lugar ag igapadayon it Amerika ro suporta kamana man magapabilin nga magatindog sa Pilipinas kadungan it mga tikang nga pagahimuon it nasyon para maipatigayon ro resupply mission.
