KALIBO, Aklan — Dismayado ro Sangguniang Panlalawigan it Aklan bangud sa usad pagong nga trabaho it Department of Public Works and Highways (DPWH) ag Tourism Infrastructure and Enterprise Zone Authority (TIEZA) sa rehabilitasyon it karsada ag drainage sa isla it Boracay.
Sa ginpatigayon nga legislative inquiry it SP, ginkumpirma it daywang ahensiya it gobyerno ro naging obserbasyon ni Board Member Esel Flores nga residente man it Boracay angot sa medyu nakatenggang infrastructure project sa isla.
Parehong ginpahayag nanday DPWH-Aklan District Engr. Noel Fuentebella ag TIEZA assistant project manager Engr. David Capispisan nga mag-eowas sa delayed nga pagpaguwa it pondo, naging problema man nanda ro naka-abang nga mga pipeline, kawad it linya it kuryente ag cables kamana man ro sewer line, gutok nga daeagan it trapiko ag mga punong kahoy sa kilid it karsada.
Ginalikawan man sigon nanda nga magtrabaho sa gabi-i bangud sa pagkabaeaka nga makadisturbo sa mga bisita nga kaabuan hay mga dumueuong.
Haeos waeong porsiyento pa eamang ro natapos sa 1.9-kilometer Phase II it proyekto nga ginaeauman nga magatapos sa 2021.
Plano it provincial board nga magpasa it resolusyon nga maga-engganyo sa Department of Budget and Management (DBM) agud nga mapadasig ro pagpaguwa it pondo para sa mga proyekto sa isla.
