KALIBO, AKLAN — Posibleng umatubang sa nagakaigu nga multa hasta sa kanselasyon it andang prangkisa ro mga operators it UV express vans nga magapataas it sukot sa pamasahe bangod sa ginapatuman nga traffic re-routing scheme it Department of Public Works and Highways (DPWH)-Aklan agud nga taw-an it daean ro rehabilitasyon sa nasamad nga karsada sa national highway nga sakop it Sitio Tulingon, Brgy. Libertad, Nabas, Aklan.
Raya ro nangin pa-andam ni LTFRB regional director Richard Osmeña matapos nga maka-abot kana ro impormasyon nga nagpataas it pamasahe ro biyahe it UV express maghalin sa Kalibo to Caticlan vice versa nga naga-agi makaron sa Pandan ag Libertad, Antique paadtu it Buruanga hasta sa banwa it Malay.
Ginasugid nga ro fare hike nga ginpatuman hay naga-abot sa P50 hasta P70 bangod nadugangan it eayo ro andang biyahe.
Suno pa kay Osmeña nga kinhangean pa nga magdihon it petition for fare hike ro anu man nga sector sa pampublikong transportasyon ag raya hay maga-agi pa sa proseso.
Hasta sa makaron hay owa pa sanda it may nabaton nga petisyon maghalin sa UV express sector agud sanda hay magpataas it pamasahe .
Sa pihak nga parte, ginpasiguro ni Osmeña nga makikipag-angot sa DPWH ag iba pang nagakaigo nga ahensiya it gobyerno agud maka-usoy it win-win solution sa nasambitang problema.
