Uwa it bag-ong kasugtanan nga may kaangtanan sa pagpasugot sa Ukraine nga gumamit it long-range missiles halinsa Western para targeton ro sueod it Russia matapos ro naging isturya sa tunga nanday US President Joe Biden ag UK Prime Minister Keir Starmer sa ginhiwat nga foreign policy summit sa White House ko rayang Biyernes.
Raya ro kinumpirma it UK PM kat mapangutana kung kinumbinsi kara si Biden nga sugtan ro Ukraine nga maghiwat it long-range Storm Shadow missiles sa Russia. Suno kana nga, naghimo sanda it mahaba ag produktibong pag-isturya sa pilang ka mga topiko kaibahan ro Ukraine, Middle East ag Indo-Pacific apang uwa it desisyon kaangot sa topiko it paggamit sa mismong weapon.
Sa grupo man it White House, nagpahayag raya it grabe nga concern sa pagtao it Iran ag North Korea it lethal weapons sa Russia. Una eon man nga nagpaandam si Russian Presidente Vladimir Putin ko rayang Biyernes sa Western nations sa posibleng giyera kung pabay-an ro Ukraine nga gamiton ro long-range missiles kuntra sa Russia.
Suno kay Putin ro misong tikang hay nagapakita it direktang partisipasyon it NATO sa Ukraine war. Una kara, makapilang uman eon man nga ingganyo eon man it Ukraine ro UK ag US nga sugtan raya nga gamiton ro long-range missiles kuntra sa mga target sa sueod it Russia.
