KALIBO, Aklan—Ro uwa it pakundangan nga importasyon ro nagapatay sa mga mangunguma it Pilipinas.
Raya ro naging reaksyon ni Lucia Francisco, regional chairperson it Gabriela women’s organization kasunod it importasyon it asukar.
Suno kana, uwa it nagakaigong regulating system ro gobyerno pag-abot sa importasyon rason nga nagapinagusto eon lang ro mga importers nga mas lalong nagpalugmok sa mga mangunguma.
Ro Pilipinas suno kana hay makabig nga sugar producer apang uwa raya ginapaumwad it gobyerno ag nagasalig sa importasyon.
Ginpaathag dugang ni Francisco nga ro andang grupo hay hugot nga nagapamaeabag sa nasambit nga polisiya it gobyerno bangud nga ro mga ganid nga negosyante ro makabenepisyo kara ag eubus nga makaeoeooy ro mga ultimong mangunguma.
Nasayuran nga bukon eamang it asukar ro ginaimport kundi pati eon man bugas ag mga agricultural products.
