Ginkumpirma it Provincial Health Office ukon PHO-Aklan nga nagapabilin nga manaba ro andang vaccination rate sa mga nagapa-booster shot it COVID 19 nga naga-abot pa eamang sa 18%.
Suno kay J-Lorenz Dionesio, vaccination manager it PHO-Aklan nga sa makaron hay 75,000 pa eamang ro nagpa-bakuna it booster shot nga masyadong maeayo sa 431,000 ukon 50% it target population.
Naga-abot man sa kapin sa 95% ro nagpaturok it una ag ikaywang dose it bakuna.
Sa makaron hay sigidas gihapon ro andang bakunahan sa provincial vaccination site sa sangka sangka mall sa banwa it kalibo umpisa Martes ag Biyernes kamana man sa nagkaeain-eain sites it mga local government units.
Gusto sigon nanda nga mas pang mapabaskog ro andang bakunahan agud nga makasabat sa ginpaguwa nga direktiba ni pangueong Ferdinand Marcos Jr nga mapataas ro vaccination rate sa sueod it syen diyas it anang termino pinaagi sa PinasLakas, sangka nationwide campaign.
Sa idaeum it nasambit nga kampanya, tuyo kara nga magtau it booster shots sa mga nagakadapat nga Pilipino ag pataason ro rate it pagbakuna sa mga senior citizen.
Sanda eon sigon ro naga-agto sa mga taeatapan , factory ag iba pang workplaces agud nga daehon ro COVID vaccine sa andang mga lugar.
Mag-request eamang sa andang taeatapan ukon magbisita sa andang official facebook page, ro provincial health office aklan ag mag-agto sa registration link.
Ginapuntirya man nanda ro mga eskwelahan eabi pa ag nag-umpisa eon ro limited face to face classes.
Ginaeuman nga engkaso nga maabot ro 50% target hay posibleng bukon eon it mandatory ro face mask sa probinsiya.
Apela man nanda nga magpabakuna eon ro mga senior citizens agud nga maabot ro target nga 90%.
Sa latest data it department of health, naga abot pa eamang sa 83% it mga lolo ag lola ro nabakunahan it first ag second dose.
Nagapabilin man nga mataas ro vaccination it pediatric population ukon 5 to 11 years old nga may 51% kapareho man sa age group nga 12 to 17 years.
Ro available nga bakuna makaron hay ro Pfizer ag sinovac
