KALIBO, Aklan–Nagapanawagan ro asosasyon it mga vendors sa Kalibo Public Market kay Mayor Juris Sucro nga indi mag-release it permit sa mga nagabaligya sa mga talipapa.
Raya hay kasunod it igapatuman nga “no permit, no katay policy” sa slaughter house it municipal economic enterprise development office ukon MEEDO-Kalibo.
Suno kay Kalibo Public Market vendors association president Arnel Meren nga ro nasambit nga tikang hay magiging owa it pueos bangud sa sigidas nga pag-release it mayors permit sa mga nagabaligya sa mga talipapa.
Aminado si Meren nga eubus nga naapektuhan ro andang kita sa pagsoeputan it mga talipapa nga nag-umpisa kat umigo ro pandemya.
Ginpahayag nga base sa record nga anang nabo-oe, naga abot sa 10 hasta 20 nga ueo it baboy ro ginakatay it sangka negosyante sa slaughter house halin sa mga talipapa kumpara kanda nga mga meat vendors sa tindahan nga naga average eamang sa sambilog hasta daywang baboy kada adlaw.
Ginpamilit pa ni meren nga umpisa ko nagtaliwan nga dag-on hay nagdihon sanda it petisyon sa taeatapan ni mayor sucro angot sa andang hinyu nga indi pagtaw-an it mayors permit ro mga talipapa vendors, apang owa pa it sabat hasta makaron.
Makarondaya man sigon ro advise kanda it market master nga si Abel Policarpio.
Nasayuran nga batyag it mga vendors ro paghina it andang kita matapos nga maging kakompetensiya ro mga talipapa vendors partikular ro ginadayo nga oyo torong area.
Tadtad sigon sanda it ginabayaran nga mga permit ag iba pang fees kumpara sa mga taga-talipapa nga kaabuan hay bogus ukon iligal.
Apela nanda nga makaron nga nagbalik eon sa normal ro sitwasyon hay taw-an man sanda it kahigayunan nga makabawi
