KALIBO, Aklan—Uman nga magabukas ro voter’s registration sa maabot nga Disyembre 12 nga magatapos sa Enero 31, 2023.
Raya ro ginpahayag ni Crispin Raymund Gerardo, tagapaghambae it Commission on Elections ukon Comelec-Aklan.
Kadungan kara, gin engganyo nana ro mga interesado nga mag-agto sa natungdan nga taeatapan it Comelec.
Bukas sanda umpisa Lunes hasta Sabado kaibahan ro holidays, alas-8:00 it agahon hasta alas-5:00 it hapon.
Kinahangean nga magdaea it birth certificate ukon anumang valid ID para sa beripikasyon it andang identity.
Gindugang pa ni Gerardo nga ro voter’s registration hay bukas para sa edad 15-anyos pataas.
Ro pagpadayun sa voter’s registration hay matapos nga owa pa nakapaguwa it resolusyon ro korte suprema kadunod sa pag-kuwestiyon sa legalidad it pagsuspinde it barangay ag sangguniang kabataan elections nga nakataeana kunta makaron nga disyembre 5, 2022.
Madumduman nga sandig sa RA 11935, ginpaisoe ro nasambit nga eleksyon ag sa baylo hay pagahiwaton raya sa ulihing Lunes it Oktubre, 2023.
Sa pihak nga parte, ginpaabot ni Gerardo nga obrahon nga prayoridad ro pagpa-rehistro bangud nga owa eon raya it extension.
