Igapadayon it Commission on Elections ro pagpatigayon it voter’s registration agud mas maabong Pilipino pa ro mataw-an it kahigayunan nga makaboto kasunod it pagpirma ni Pangueong Ferdinand Marcos Jr. sa Republic Act 11935 nga nagapaiway sa Barangay ag Sangguniang Kabataan elections nga nakataeana kunta sa Disyembre it presenteng dag-on paadto sa unang Lunes it Oktobre 2023.
Suno kay Crispin Raymund Gerardo, tagapaghambae it Comelec Aklan, ginahueat pa nanda makaron ro guidelines nga igapaguwa it poll body angot sa adjustment it calendar para sa mga masunod nanda nga aktibid.
Ginpahayag dugang ni Gerardo nga uwa it nauyang ag tanan nanda nga preparasyon hay napanipuslan.
Nauna eon nga gin-umpisahan it Comelec ro pagpaimprinta it mga balota nga pwede gihapon nga magamit para sa masunod nga dag-on.
Nasayuran nga nakabaehag sa bag-ong laye nga ro term of office it mga mailihir nga mga barangay ag SK officials hay maga-umpisa sa Nov. 30 matapos ro eleksiyon.
Madumduman nga ginpalig-on it Senado ag Kamara ro consolidated version it House Bill No. 4673 ag Senate Bill No. 1306 ko Sept. 28, 2022 sa pihak it pagpamaeabag it pilang grupo, kaparehas it Namfrel ag iba pa
